ساڈا وِژن ریاست مدینہ اے‘ ریاست مدینہ بنن وچ ویلا لگدا اے،کامیاب خارجا پالیسی نے بھارت دا گھمنڈ مُکایا، جہڑی معیشت ملی سی اوہ ایہ سی‘ 20 ارب ڈالر دا کرنٹ اکاؤنٹ کسارا سی: وزیراعظم عمران خا ن……٭رویل نیوز٭

اسلام آباد (نمایندا رویل) وزیراعظم عمران خا ن نے کہیا اے کہ ساڈی خارجا پالیسی نے بھارتی غرور خاک وچ رلا دِتا‘ ایہ حکومت دی وڈی کامیابی اے‘ کامیاب خارجا پالیسی کارن اج اسیں کسے دی جنگ لڑ رہے آں نہ کوئی پاکستان نُوں دوغلا کہندا اے‘ ٹرمپ وی افغانستان وچ مدد لئی ساڈے توں درخاست گزار نیں‘ بھارت تے ایران توں ٹڈی دل آن دا خطرا اے‘ کرونا وایرس بارے فیصلیاں وچ حکومت وچ کوئی ابہام نہیں‘ اسیں معیشت نُوں ساہمنے رکھ کے سارے اقداما ت چُکے‘ ٹڈی دل تے کرونا دے خاتمے لئی پورا زور لاواں گے‘ جمہوریت میرٹ تے احتساب نال اگے ودھدی اے‘ اپوزیشن اُتے واضح کرنا چاہندا آں کسے نال دشمنی نہیں پر لیڈر شپ دا احتساب ہووے گا‘ حکمران دا احتساب نہیں ہووے گا تے ملک ترقی نہیں کر سکدا‘ اسیں وی سپریم کورٹ وچ اپنے فلیٹ دا حساب دِتا‘ بیوی دے پیسیاں نال خریدے گھر دی منی ٹریل دِتی‘ شوگر انکوایری ملک وچ تواریخی انکوایری سی‘ شوگر دی قیمت دا فیصلا شوگر ملز ایسوسی ایشن کردیاں سن‘ کھنڈ وچ مل مالکان نے 29 ارب رُپئے دی سبسڈی لئی‘ 9 ارب دا کل ٹیکس دِتا۔ جمعرات نُوں قومی اسمبلی وچ خطاب کردیاں ہویاں وزیراعظم عمران خان نے کہیا کہ 31 جنوری توں ٹڈی دل بارے ایمرجنی لائی ہوئی اے‘ این ڈی ایم اے نُوں اختیارات دِتے ہوئے نیں‘ حکومت این ڈی ایم اے نُوں سارے وسایل فراہم کرن دی کوشش کر رہی اے‘ کجھ شیواں باہروں آنیاں سن اوہ کرونا دی وجھا توں نہیں آ رہیا‘ ٹڈی دل دا اِک وڈا جھتا افریقا توں آ رہیا اے‘ اللہ توں دُعا اے کہ ساڈے ملک اُتے رحم کرے‘ پوری قوم ایہدا مقابلا کرے گی۔ اوہناں نے کہیا کہ وار وار کہیا جا رہیا اے کہ کرونا اُتے کنفیوژن سی‘ اسیں کلا ملک آں جتھے اسیں پالیسی وچ بڑے واضح ساں‘ میرے کسے بیان وچ 13 مارچ توں اج تک کوئی تضاد نہیں۔ اوہناں نے کہیا کہ پاکستان تے ہندستان دی صورتحال ہور یورپی ملکاں توں مختلف اے‘ ساڈے ملک اُتے اللہ دا بڑا کرم اے‘ اگلا مرحلا بڑا مشکل اے‘ ایس او پیز دی پیروی کرنی پوے گی‘ احتیاط نہ کیتی گئی تے ساڈے ہیلتھ سیکٹر اُتے پریشر ہور ودھے گا‘ اگلا فیز ایس توں وی ودھ مشکل اے۔اوہناں نے کہیا کہ اِک مہینے وچ اسیں احتیاطی تدبیراں اختیار کیتیاں تے اسیں صورتحال اُتے قابو پا لواں گے‘ دنیا دی اکانومی نُوں 12 ٹریلین دا نقصان ہو چکیا اے‘ 100 سال وچ پہلی وار ایہو جہیا معاشی بحران آیا اے‘ اسیں کرونا دے پچھے نہیں لُک رہے۔سانوں جہڑی معیشت ملی سی اوہ ایہ سی‘ 20 ارب ڈالر دا کرنٹ اکاؤنٹ کسارا سی‘ درآمدات 60 ارب ڈالر تک سن‘ مہنگائی کویں نہ ہوندی ڈالر 104 دا سی‘ سانوں 122 اُتے مِلیا۔ جدوں ایڈجسٹمنٹ ہوئی تے اِک وار مہنگائی تے آنی سی‘ 2013 وچ قرضا 16 ہزار سی‘ سانوں حکومت ملی تے قرضا 30 ہزار ارب ہو چکیا سی‘ جہڑا ٹیکس اکٹھا کیتا اوہ ادھا قرضیاں وچ چلا گیا‘ حال ایہ سی کہ ساڈے کول قرض ادا کرن لئی پیسے نہیں سن‘ اسیں دوست ملکاں دے کول گئے کہ قرض دوو‘ مینوں شرم آئی جدوں میں دوجے ملک توں پیسے منگن لگا۔ اوہناں نے کہیا کہ ملک دا وزیراعظم ملک داپیو ہوندا اے تے قوم اوہدے بچے ہوندے نیں‘ جے بچے بھُکھے ہون‘ علاج نہ کروا سکدے ہون تے تُسیں بادشاہ وانگوں نہیں رہ سکدے‘ گیس‘ بجلی تے ہور معاہدے اسیں نہیں ساڈے توں پہلیاں حکومتاں کر کے گئیاں‘ ساڈے توں جواب منگیا جا رہیا اے جواب اوہناں توں منگیا جاوے جہڑے ملک نُوں ایس حال وچ چھڈ کے گئے۔وزیراعظم نے کہیا کہ ساڈے امریکا نال برابری دے تعلقات نیں‘ اج امریکا نے منیا کہ عمران خان درست کہندا سی کہ افغانستان دا حل فوجی نہیں سیاسی اے‘کشمیر دا مسئلا حل ہو جاوے تے بھارت تے پاکستان وچکار کئی مواقع نیں‘ بھارت وچ بہت تکبر سی‘ بھارت وچ چوناں توں پہلے سخت لہجا اختیار کیتا گیا‘ 5 اگست نُوں کشمیر نُوں غیر قانونی طریقے نال بھارت دا حصا بنان دی کوشش کیتی گئی‘ ساڈا ہندوتوا دی آئیڈیالوجی نال مقابلا اے‘ بھارت سانوں نَپ کے رکھنا چاہندا اے‘ ہُن بھارت نے کئی تھاں اُتے ازاد کشمیر نُوں اپنے اندر وکھان دی کوشش کیتی اے‘ اقوام متحدا وچ کشمیر دا مسئلا چُکیا‘ مودی بہت وڈا جنونی اے‘ ایہ عام بندا نہیں جنونیت پسند اے‘ کشمیر دی موومنٹ ہُن رُک نہیں سکدی‘ اسیں ایس ایشو نُوں اگے لے کے چلاں گے۔ساڈا وِژن ریاست مدینہ اے‘ ریاست مدینہ بنن وچ ویلا لگدا اے۔اسیں نہ نیب بنایا تے نہ کوئی اوتھے بھرتی کروایا پر گالھاں مینوں پیندیاں نیں‘ ڈیبیٹ دی وی جمہوریت وچ بہت اہمیت اے‘ جدوں ایتھے ڈیبیٹ کرو اپوزیشن نیب نیازی گٹھ جوڑ دا رؤلا پانا شروع کر دیندی اے۔