kraamaat@gmail.com
+ +92 333-430-6384
نزہت عباس
July 20, 2020
اماں پارو ــــــــ نظم ـــــــ ٭رویل٭
اماں پارو پریشان اے کہ اوہناں دی آسٹریلین آرٹ ٹیچر نے اپنی ۵۰ویں سالگرھادے موقع تے اعلان کیتا کہ اوہ ایس سال اپنے انگریز دوست نال ویاہ کر رہی اے۔اماں پارو منہ تے دُپٹا رکھ کے کجھ بُڑ بُڑ کر رہی سی کہ میں اوس دا حال پچھ لیا:
ویکھ ذرا کیہ ویلا آیا ؟
گوری ہو گئی جھلی
بڈھے ویلے خصماں ماری
کجھ وی سمجھ نہ پا وئے
قبریں ٹنگاں، شگن مناوئے
۵۰ ورھیاں دی ہوئی
لگی اگ ویاہ کرن دی
گوری کملی ہوئی۔
کیہ ہویا جےمیں ہن پُھلی؟
سروں دے پھل ورگی عمرے
میں وی پیار سی کیتا
کڑیئے ،جد میرا ویاہ ہویا سی
عمر پٹولھے ورگی سی
ریشم دی تند ورگاجُسا
دُدھ ملائی مکھ سی
ایسی چڑھی جوانی جویں
سیباں بھریا رُکھ سی
ساٹن دے میں کپڑے پا کے
ککلی جد میں پاندی
ہر کوئی مر مرجاندا میتھو ں
ونگاں جدچھنکاندی
انکل تیرا آسے پاسے
ہر ویلے سی رہندا
میرے نال ویاہ کریں گی؟
آکھے اُٹھدا بہندا
پاروتینوں سکھ دیا ں گا
ہوکے بھر بھر کہندا
اک دن اوس توں پچھ میں بیٹھی
ویاہ ویاہ کردا پھردا ایں
ویاہ کرن لئی
تن چیجاں دی لوڑ اے ہوندی
ہے تیرے کول
میرے لئ گُلی ؟
رنگلی جُلی ؟اک نگھی کلی ؟
سوچی پے کے آکھن لگا
بلھے شاہ نے گل سمجھائی
رب توں بندیا منگ
گُلی، جُلی، کُلی
میں تے عاشق دل تیرے دا
رل مل لبھ ساں گُلی، جُلی،کُلی
ایہ سن کے میں ہس ہس پھُلی
پیار چ رستا بُھلی
کیہ دساں اوس عاشق خاطر
پنڈ وی چھڈیا ، چھڈے ماپے
پردیساں دےوچ رُلی
اکو گل سمجھ ہے آئی
ڈاڈھی اوکھی ہے کمانی
ایہ گُلی جُلی کُلی!
٭٭٭٭٭
