دیس اندر کرونا روگی گھٹ رہے نیں: ڈاکٹر ظفر مرزا دا ٹویٹ……٭رویل نیوز٭

اسلام آباد (نمایندا رویل) پاکستان وچ کرونا وایرس دے کیساں وچ گھاٹ جا رہی اے تے پچھلے 24 گھنٹیاں دے دوران 1176 بندیاں وچ ایس وایرس دی تشخیص ہوئی اے جد کہ 20 روگی واصل ہوئے نیں جو کہ پچھلے 3 مہینیاں دے دوران 1 دن وچ واصل ہون والیاں دی سبھ توں گھٹ گنتی اے۔ نیشنل کمانڈ اینڈ اپریشن سینٹر دے مطابق پچھلے 24 گھنٹیاں دے دوران پورے ملک وچ مجموعی طور اُتے 22 ہزار 56 ٹیسٹ کیتے گئے نیں جد کہ ہُن تک پورے ملک وچ 18 لکھ 90 ہزار 236 ٹیسٹ ہو چکے نیں۔ 24 گھنٹیا ں دے دوران 1176 نویں روگیاں دی تشخیص ہوئی اے۔ پاکستان وچ ہُن تک کرونا وایرس دے 2 لکھ 74 ہزار 288 روگیاں دی گشخیص ہو چکی اے۔ سرکاری آنکڑیاں دے مطابق کرونا وایرس دے 2 لکھ 74 ہزار 288 مصدقا روگیاں وِچوں 2 لکھ 41 ہزار 26 بندے صحت یاب ہو چکے نیں‘ ایس طرحاں پورے ملک وچ کرونا دے فعال روگیاں دی گنتی 27 ہزار 421 رہ گئی اے۔دوجے پاسے وزیراعظم دے معاون خصوصی برائے صحت ڈاکٹر ظفر مرزا نے ٹویٹ پیغام وچ کہیا اے کہ پاکستان وچ کرونا وایرس نال مَوتاں وچ 87 فیصد کمی آئی اے پر حالے وی لا پرواہی دی گنجایش نہیں اے۔ اوہناں دا کہنا سی کہ الحمداللہ اج پاکستان وچ پچھلے 3 مہینیاں دے دوران کووڈ 19- نال سبھ توں گھٹ مَوتاں ریکارڈ ہوئیاں نیں۔