پاکستان دنیا دا عظیم ملک اے تے پاکستانی دنیا دی عظیم قوم نیں:عثمان بزدار ……٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نے حضوری باغ وچ ازادی دیہاڑ دے موقع اُتے پرچم کشائی دے بعد تقریب نال خطاب کردیاں ہویاں کہیا کہ پاکستان دا ازادی دیہاڑی ہر شہری لئی بے حد خُشی دا دن اے‘ پاکستان دی 74 ویں سالگرھا اُتے پوری قوم نُوں مبارکباد پیش کردا آں۔ ازادی دیہاڑ تحریک پاکستان دے آگوواں‘ کارکناں تے شہداء نُوں خراج تحسین پیش کرن دا دن اے۔ اوہناں نے کہیا کہ تحریک پاکستان دے آگو‘ کارکن تے شہداء پاک سرزمین لئی اپنا تن من دھن قربان کر کے تواریخ وچ امر ہو گئے۔ ازادی دیہاڑ سانوں یاد دواندا اے کہ سانوں ازادی خیرات وچ پیش نہیں کیتی گئی‘ ازادی دی نعمت لکھاں مسلماناں دی عظیم جدوجہد تے ب مثلا قربانیاں دا ثمر اے تے ایہناں بے مثال قربانیاں دے نقوش اج وی تازے نیں تے سانوں جہد مسلسل دا درس دے رہے نیں۔ اوہناں نے کہیا کہ پاکستان تے کشمیر اِک دوجے لئی ضروری نیں‘ دُعا گو آں کہ اللہ تعالیٰ کشمیریاں نُوں وی چھیتی توں چھیتی ازادی دی نعمت عطاء فرمائے۔ اوہناں نے کہیا کہ پاکستان دنیا دا عظیم ملک اے تے پاکستانی دنیا دی عظیم قوم نیں‘ 14 اگست پاکستان دی تعمیر و ترقی دے عہد دی تجدید دا دن اے‘ پوری قوم وطن عزیز دی تعمیر و ترقی تے عظمٹ و بلندی لئی متحد‘ متفق تے اِک مُٹھ اے۔