ایہ حکمران تے پاکستان اکٹھے نہیں چل سکدے، اسیں 70 سال کشمیریاں دی کیہ جنگ لڑی اے؟: مولانا فضل الرحمان……٭رویل نیوز٭

پشاور (نیوز ڈیسک) جمعیت علماء اسلام (ف) دے امیر مولانا فضل الرحمان نے کہیا اے کہ قرآن و سنت دے منافی قانون نہیں بن سکدا‘ اسیں دھاندلی نُوں چیلنج کیتا۔ پشاور وچ جمعیت علمائے اسلام دی تقریب نال خطاب کردیاں ہویاں مولانا فضل الرحمان دا کہنا سی کہ اسیں 70 سال کشمیریاں دی کیہ جنگ لڑی اے؟ اوہناں نے کہیا کہ کل سوچ رہے ساں کہ سری نگر کویں لینا اے اج سوچدے آں مظفر آباد کویں بچانا اے۔ مولابنا فضل الرحمان نے کہیا کہ بھارت نے مقبوضا کشمیر وچ غیر قانونی اقدام کیتا‘ ایہناں حکمراناں دی ساڈی تہذیب نال کوئی وابستگی نہیں اے۔ فضل الرحمان نے کہیا کہ ملک نُوں آئین تے قانون دی اُچیرتا ول لے جانا چاہندے آں‘ آمرانا رویاں نال پہلے وی لڑدے ساں ہُن وی لڑاں گے۔ اوہناں نے کہیا کہ سانوں تہاڈے حربیاں توں کوئی خوف نہیں اے‘ ذاتی تے پارٹی مفادات توں بالا تر ہو کے ملکی مفاد لئی سوچنا پوے گا۔ فضل الرحمان نے کہیا کہ ملک نُوں بچانا اے تے ایہناں حکمراناں نُوں کڈھنا پوے گا‘ ایہ حکمران تے پاکستان اکٹھے نہیں چل سکدے‘ اسیں مصلحتاں توں بالا تر ہو کے پاکستان بچان لئی جدوجہد کرنی اے تے حکمراناں نُوں نسانا اے۔ فضل الرحمان نے کہیا کہ سانوں اِک زمانے وچ کہیا گیا کہ پشتوناں وچ مذہب دیاں جڑاں گوڑھیاں نیں ایس لئی ایہو جہی پارٹی نُوں مسلط کیتا گیا‘ ایہناں حکمراناں دا نہ تے مذہب نال کوئی تعلق اے تے نہ تہذیب نال ایہ نہ تے پشتون نیں نہ پاکستانی نیں تے نہ ای ایہناں نُوں اخلاق دا علم اے‘ حکمران لکھ نیب نُوں استعمال کر لین اسیں ڈرن والے نہیں ایہ آمرانا رویا اے ت اسیں آمرانا رویاں نال لڑنا جاندے آں‘ لوکائی مہنگائی توں تنگ آ چکی اے‘ تاجر تے صنعتکار دے اتھرو رو رو کے خشک ہو چکے نیں تے مایوس ہو کے بَہ گئے نیں۔ اوہناں نے کہیا کہ اسیں مصلحتاں دا شکا ر ہو رہے آں نہ کشمیریاں دی ازادی نال وفا کر رہے آں تے نہ فلسطینیاں دی ازادی نال‘ کشمیریاں دا خون وگ رہیا اے۔