ماضی وچ اپوزیشن جماعتاں نے معیشت نُوں تباہ و برباد کیتا:سردار عثمان بزدارــــ٭رویل نیوز٭

لاہور (نمایندا رویل) وزیر اعلا پنجاب سردار عثمان بزدار نے کہیا اے کہ اپوزیشن جماعتاں دے کول کوئی ایجنڈا نہیں۔ اپوزیشن آگوواں نے کرونا ورگے قومی چیلنج اُتے وی سیاسی پوائنٹ سکورنگ دی ناکام کوشش کیتی۔ وزیر اعلا عثمان بزدار نے کہیا کہ وزیراعظم عمران خان دی کامیاب حکمت عملی دے کارن کرونا دا کھلار گھٹ ہویا اے تے وزیراعظم عمران خان دے انسداد کرونا دے مؤثر اقدامات نُوں عالمی سطح اُتے وی سلاہیا گیا اے۔ کرونا اُتے منفی سیاست کرن والیاں نُوں ہُن انتشار دی سیاست توں توبا کر لینی چاہیدی اے۔ اپوزیشن آگوواں نُوں لوکائی دے مسئلیاں نال کوئی سرو کار نہیں۔ لوکائی جاندی اے کہ ماضی وچ ایہناں جماعتاں نے معیشت نُوں تباہ و برباد کیتا تے ہُن مسترد شدا رعناصر ملک نُوں درست سمت اُتے چلدا ویکھ کے بوکھلاہٹ دا شکار نیں۔ اوہناں نے کہیا کہ وزیراعظم عمران خان دی قیادت وچ حکومت نے تبدیلی دی بنیاد رکھ دِتی اے۔ عام بندے نُوں ریلیف دین لئی ہر کم کر جاواں گے‘ اپوزیشن جماعتاں ولوں اے پی سی دا ڈراما لگن توں پہلے ای فلاپ ہو چکیا اے۔اپوزیشن آگوواں نے صرف ذاتی مفادات دے تحفظ لئی اے پی سی دا شوشا چھڈیا۔ اوہناں نے کہیا کہ پاکستان دی ترقی تے لوکائی دی خشحالی دا سفر کھوٹا کرن والے ہور 3 سال صبر کرن۔ اپوزیشن لُٹ مار نال جمع دولت بچان دی ناکام کوشش کر رہی اے۔ اوہناں نے کہیا کہ لوکائی دے رَد شدا عناصر دے ہتھ پہلے کجھ آیا اے نہ اگے آئے گا۔ پاکستان دی 22 کروڑ لوکائی نُوں وزیراعظم عمران خان دی شفاف قیادت اُتے پورا اعتماد اے۔ وزیراعظم عمران خان ملک نُوں درپیش اندرونی تے بیرونی چیلنجز دا پامردی نال مقابلا کر رہے نیں۔ پی ٹی آئی دی حکومت عوامی خدمت تے قومی ترقی دے مشن اُتے عمل پیرا اے تے حکومت مدت پوری کرے گی۔