عمران خان نے سجے تے کھبے پکھ دی سیاست نُوں ختم کر کے درست تے غلط دی سیاست کیتی: وزیر اطلاعات و نشریات شبلی فراز ……٭رویل نیوز٭

اسلام آباد (نمایندا رویل) تحریک انصاف دی حکومت نے اپنی 2 سالا کمکاری لوکائی دے ساہمنے رکھدیاں ہویاں نوید سنائی ا ے کہ پاکستانی معیشت بحراناں توں نکل آئی ا‘ جمہوریت وچ حکومت لوکائی دے ساہمنے جوابدہ ہوندی اے‘ اسیں ذاتی مفادات لئی سیاست نہیں کردے‘ عمران خان دا مقصد صرف تے صرف فلاحی ریاست دا قیام اے۔ وزیراعظم عمران خان نے مسئلا کشمیر نُوں بین الاقوای سطح اُتے چُکیا‘ اج کشمیر دا مسئلا پوری دنیا وچ پہنچ چکیا اے‘ دنیا نے پاکستان دا مؤقف منیا‘ او آئی سی وچ کشمیر اُتے چار بیٹھکاں ہوچکیاں نیں‘ ادفغانستان وچا من دا سہرا پاکستان دے سر اے‘ جدوں حکومت ملی تے ملک وچ بحرانی کیفیت سی‘ 20 ارب ڈالرز دا کرنٹ اکاؤنٹ کسارا سی‘ ملک نُوں دیوالیا ہون دا خظرا سی‘ ملک دی تواریخ وچ پہلی وار حکومت نے اخراجات وچ کمی کیتی‘ اسیں 5 ہزار ارب رُپئے دے قرضے واپس کیتے‘ فوج دے اخراجات نُوں منجمد کیتا گیا‘ حکومت نے کرونا م متاثرین لئی بہترین پیکج دِتا‘ کمزور طبقے تک فوری نقد رقم پہنچائی گئی‘ حکومت نے بلا تعصب 1 کروڑ 60 لکھ پاکستانیاں نُوں امداد دِتی‘ 250 ارب رُپئے ونڈے گئے۔ معیشت دی بہتری ساڈی پہلی ترجیح رہی اے‘ 2 سال دے دوران حکومت دی کفایت شعار پالیسی دے تحت کجھاداریاں نُوں مختلف اداریاں وچ ضم کیتا گیا کرونا وایرس دی وجھا توں معیشت نُوں جھٹکا لگا‘ اسیں کرونا نال نبڑن لئی ویلے سر فیصلے کیتے‘ کرونا نال نبڑن لئی پاکستان دی سمارٹ لاک ڈاؤن دی حکمت عملی دی پور دنیا وچ تعریف کیتی گئی‘ بل گیٹس نے پاکستان تے بھارت دا کرونا کیسز بارے موازنا کیتا۔ وسیلیاں مطابق منگل والے دن وفاقی وزراء شبلی فراز‘ شاہ محمود قریشی‘ حفیظ شیخ‘ حماد اظہر‘ اسد عمر تے ثانیہ نشتر نے پریس کانفرنس کردیاں ہویاں تحریک انصاف دی 2 سالا کمکاری نُوں بہترین متھ دِتا۔ وزیر اطلاعات و نشریات شبلی فراز نے کہیا اے کہ عمران خان نے سجے تے کھبے پکھ دی سیاست نُوں ختم کر کے درست تے غلط دی سیاست کیتی ایہو بیانیا اسیں لے کے چل رہے آں‘ جمہوریت وچ حکومت لوکائی دے ساہمنے جوابدہ ا‘ اسیں ذاتی مفادات لئی سیاست نہیں کردے‘ ساڈی سیاست دا مقصد فلاحی ریاست دا قیام اے‘ وزیراعظم نے سیاست نُوں پیسا بنان والیاں نُوں رَد کر دِتا اے‘ وزیراعظم عمران خان محنتی تے دیانتدار لیڈر نیں‘ احتساب‘ انصاف‘ میرٹ تے پسماندا طبقے دی ترقی وزیراعظم دا وژن اے۔ عمران خان اِک غریب پرور بندے نیں جہناں دی ایہ سوچ اے کہ ملک نُوں کس طرحاں اگے لے جایا جاوے تے کس طرحاں ملک نُوں فلاحی ریاست بنایا جا سکے تے 2018 وچ ساڈی حکومت بنن دے بعد ایہناں اہداف دا حصول ممکن ہویا جد کہ ساڈیاں ساریاں پالیسیاں وی ایسے سوچ دے دوالے گھمدیاں نیں‘ ساڈا چیلنج صرف ایہ نہیں کہ حکومت دیاں کامیابیاں دی تشہیر کیتی جاوے سگوں سانوں اندرونی تے بیرونی محاذ اُتے لڑنا اے۔ اوہناں نے کہیا کہ فتھ جنریشن وار چل رہیا ے دشمن سانوں ہر طرحاں دا نقصان پہنچانا چاہیدا اے‘ ساڈی معیشت تباہ کرنا‘ ملک وچ نا امیدی کھلارنا چاہندا اے جہدے نال نبڑن لئی وزارت اطلاعات عمران خنا دی قیادت وچ اپنا بھرواں کردار ادا کرے گی۔ سوشل میڈیا تے ڈیجیٹل میڈیا دا دور اے جہدے وچ ہر پاکستانی صحافی بن گیا اے ہُن سانوں ایہ جنگ پورے ملک دی سطح اُتے لڑنی اے جہدے وچ ہر پاکستانی شامل ہووے گا جہدے وچ اسیں کامیاب ہوواں گے۔ وزیر خارجا شاہ محمود قریشی نے کہیا کہ ساڈی کوش رہیا ے کہ اسیں اپنے ملک لئی مؤثر بیانیا پیش کریے‘ اسیں دوست ملکاں دے نال تعلقات مستحکم بنان دی کوشش کیتی‘ گوانڈھی ملکاں نال چنگے تعلقات ساڈی خارجا پالیسی دا حصا اے۔ اوہناں نے کہیا کہ بھارت پاکستان نُوں سفارتی اکلاپے نال دوچار کرن دا خاہشمند اے‘ جنوبی ایشیا دے سارے ملک بھارت دے ناپاک عزایم دا شکار نیں‘ کامیاب خارجا پالیسی دی وجھا تو اج دنیا افغانستان وچ من دا سہرا پاکستان نُوں دے رہی ا۔ اوہناں نے کہیا کہ کرونا دی وجھا توں دنیا دا منظر ناما بدل رہیا اے‘ حکومت نے کرونا دی صورتحال وچ مشکل فیصلے کیتے تے اج ساڈی حکمت عملی نُوں پوری دنیا وچ سلاہیا جا رہیا اے‘ کووڈ 19 دے بعد دنیا بدلی ہوئی نظر آئے گی۔ مشیر خزانا عبدالحفیظ شیخ نے معاشی میدان وچ حکومت دی 2 سالا کمکاری دے حوالے توں کہیا کہ جدوں حکومت آئی ملک وچ بحرانی کیفیت سی‘ 20 ارب ڈالرز دا کرنٹ اکاؤنٹ کسارا سی‘ زرمبادلا دے ذخیرے ادھے رہ گئے سن‘ ملک دیوالیا ہون دا خطرا سی موجودا حکومت نے ملک دی کمزور معیشت نُوں سہارا دینا سی۔ مشیر خزانا نے کہیا کہ اسیں مشکل حالات وچ وڈے فیصلے کیتے‘ آئی ایم ایف دے نال اہم معاہدا کیتا گیا‘ بیرونی کسارے نُوں 20 ارب ڈالرز توں گھٹ کر کے 3 ارب ڈالرز کر دِتا گیا‘ ملک دی تواریخ وچ پہلی وار حکومت نے اخراجات وچ کمی کیتی‘ اسیں ماضی دے قرضیاں دا بھار وی گھٹ کیتا‘ اسیں 5 ہزار ارب رُپئے دے قرضے واپس کیتے‘ برآمدات وچ وادھے لئی سہولتاں دِتیاں‘ اسیں چالوس ال کسے وزارت نُوں کوئی سپلیمنٹری گرانٹ نہیں دِتی‘ ٹیکس نظام وچ بہتری لئی حکمت نے بہترین کم کیتا۔ وزیر صنعت و پیداوار حماد اظہر نے کہیا کہ معیشت دی بہتری ساڈی پہلی ترجیح اے‘ 2 سال دے دوران حکومت دی کفایت شعاری پالیسی دے تحت کجھ اداریاں نُوں مختلف اداریاں وچ ضم کیتا گیا‘ اسیں پاکستان سٹیل مل بارے اقدام کیت‘ ملک توں سمگل شدا فون ختم کیتے گئے‘ ٹیکسز دی شرح نُوں گھٹ کیتا گیا‘ تعمیراتی شعبے لئی پیکج دِتا جہدے کارن اسیں مون سون دے بعد تعمیراتی شعبے وچ ترقی ویکھ رہے آں۔ اوہناں نے کہیا کہ بجلی دے بلاں وچ صنعتاں نُوں ریلیف دِتا گیا‘ ٹیکس فری بجٹ دِتا گیا۔ وزیر ترقی و منصوبا بندی اسد عمر نے کہیا کہ سانوں مختلف چیلنجز دا ساہمنا رہیا‘ حکومت اُتے نا اہلی دے الزامات لائے جاندے نیں‘ کہیا جاندا اے کہ عمران خان دوجیاں نُوں نال لے کے نہیں چلدے تے ایہ سچ اے کہ عمران خان دوجیاں نُوں نال لے کے چلن لئی این آر او نہیں دے سکدے‘ عمران خان ملکی مفاد لئی نال چلن دی گل کردے نیں‘ 22 سال دی جدوجہد دے بعد عمران خان وزیراعظم بنے جہدی کوئی مثال نہیں‘ اپوزیشن لئی بُری خبر ایہ اے کہ کپتان کریز اُتے سیٹ ہو گیا اے‘ کپتان ہُن لمی اننگز کھیڈن لئی مکمل تیار اے۔ وزیراعظم دی معاون خصوصی ثانیہ نشتر نے کہیا کہ احساس کفالت پروگرام حکومت دا بہترین منصوبا اے‘ ایس پروگرام دے تحت شفاف طریقے نال مالی امداد ونڈی گئی‘ احساس کفالت پروگرام دے تحت 70 لکھ مستحقین نُوں مہینا وار وظیفا دِتا جارہیا اے‘ احساس لنگر خانیاں اُتے توجا دِتی گئی۔