ورھدے مِینہ نے کیتی تباہی ، پنجاب اندر ستارھاں بندے واصل……٭رویل نیوز٭

لاہور (نمایندا رویل) پنجاب دے مختلف علاقیاں وچ مِینہ کارن مکاناں دیاں چھتاں تے مٹی دیاں چِلھاں ڈِگن نال 17 بندے واصل جد کہ کئی زخمی ہو گئے۔ وسیلیاں مطابق لاہور دے علاقے ہربنس پورا دی ابراہیم کالونی وچ مکان دی چھت ڈِگن نال 4 بندے واصل تے سوانیاں سنے 5 بند ے زخمی ہو گئے‘ وال ہون والے بندیاں دی شناخت صابر‘ کامران‘ اعظم تے اسلم دے ناں نال ہوئی اے جد کہ زخمیاں وچ حبیب اللہ‘ ساحل‘ قمر بی بی‘ فاطمہ بی بی‘ فاطمہ تے فریدہ بی بی شامل نیں۔ شیخوپورا وچ مریدکے روڈ اُتے واقع ملیاں کلاں وچ بارش دے کارن افتخار نامی بندے دے مکان دی چھت ڈِگن نال 9 بندے ملبے تھلے نَپے گئے۔ واقع وچ اِک بچّا تے اِک سوانیواصل جد کہ 7 زخمی ہو گئے۔ جڑانوالا دے تھانا صدر دیاں حداں وچ واقع پنڈ چک نمبر 119 گ ب وچ خستا حال چھت ڈِگن نال ارشد نامی بنداچلانا کر گیا۔ فیصل آباد وچ کرنٹ لگن دے مختلف واقعات وچ 2 بندے زندگی دی بازی ہار گئے۔ پھالیا وچ شدید بارش کارن مکان دی چھت ڈِگن نال ماں تے 4 بچے چلانا کر گئے۔ واصل ہون والیاں وچ 33 سالا رقیہ‘ 8 سالا سارم معاویہ‘ 5 سالا عاتکہ عافیہ‘ 3 سالا محمد عامر تے 2 سالا محمد حاشر شامل نیں۔ کلر کہار وچ کوئلے دی کان اُتے کم کرن والے بندے کان وچ ای بنے کمریاں وچ سَو رہے سن کہ بارش کارن اوہناں اُتے مٹی دی چِلھ آن ڈِگی جہدے نتیجے وچ 3 بندے لقما اجل بن گئے۔ واصل ہون والیاں وچ اسحاق‘ شمشیر تے ارسلا شامل نیں۔