کرونا نے اٹھاں روگیاں دی جان لے لئی ساڈھے پنج سو نویں کیس آ گئے……٭رویل نیوز٭

اسلام آباد (نمایندا رویل) پچھلے 24 گھنٹیاں دے دوران کرونا وایرس دے ساڈھے پنج سونویں کیسز تے 8 مَوتاں ریکارڈ ہوئیاں نیں۔ پورے ملک وچ کرونا نال مَوتاں دی مجموعی گنتی 6209 ہو گئی اے۔ نیشنل کمانڈ اینڈ اپریشن سینٹر دے مطابق پورے ملک وچ کرونا ایکٹیو کیساں دی گنتی 11 ہزار 945 اے تے ہُن تک 2 لکھ 72 ہزار 804 کرونا متاثرین صحت یاب ہو چکے نیں۔ پچھلے 24 گھنٹیاں دے دوران کرونا دے 23 ہزار 670 ٹیسٹ ہوئے تے پورے ملک وچ کرونا دے 23 لکھ 63 ہزار 752 ٹیسٹ کیتے جا چکے نیں۔ سندھ وچ کرونا دے سبھ توں ودھ 1 لکھ 27 ہزار 60 کیسز رپورٹ ہوئے۔ پنجاب وچ 95 ہزار 800 کیس رپورٹ ہوئے نیں۔ پورے ملک دے ہسپتالاں وچ 130 روگی وینٹی لیٹر اُتے نیں۔ ہسپتالاں وچ کرونا وینٹی لیٹرز دی گنتی 1 ہزار 920 اے۔ پورے ملک وچ 735 ہسپتالاں وچ کرونا روگیاں لئی سہولتاں موجود نیں تے ایس ویلے 1 ہزار 241 روگی ہسپتالاں وچ داخل نیں۔