حکومت فلم انڈسٹری ول وی توجا دیوے: اداکارا نرما……٭رویل نیوز٭

لاہور (نمایندا رویل) اداکارا نرما نے کہیا اے کہ موجودا حالات نال انج لگدا اے کہ شاید ای پنجابی فلماں دا سنہری دور کدی واپس آئے۔ اِک انٹرویو وچ اوہناں نے کہیا کہ کجھ بھیڑیاںپالیسیاں دی وجھا توں پنجابی فلماں نُوں نقصان پہنچیا۔ ساڈے کول انتہائی باصلاحیت لوک موجود نیں جو سرمایا کاری نہ ہون دی وجھا توں گھراں وچ فارغ بیٹھے نیں۔ نرما نے کہیا کہ ویلے دی حکومت نُوں چاہیدا اے کہ فلم انڈسٹری ول وی توجا دیوے تے ایہنوں دُبارا اپنے پَیراں اُتے کھڑا کرن لئی معاونت کرے تاں جے شائقین فلم نُوں دُبارا ماضی وانگوں چنگیاں تے معیاری فلماں ویکھن نُوں مل سکن۔ اِک سوال دے جواب وچ اوہناں نے کہیا کہ میں ذاتی طور اُتے بھارتی فلماں نُوں پسند نہیں کردی کیوں جے بھارتی فلماں دی وجھا توں ساڈی تہذیب نُوں شدید نقصان پہنچیا اے۔