تعلیم گرہن ۔۔۔بابا سائیں(قسط 4)

تعلیم گرہن ۔۔۔بابا سائیں(قسط 4)

زندگی وچ محنت بہت معنی رکھدی اے تے میرے ورگا بندا کوشش نوں تقدیر سمجھدا اے لیکن افسوس کہ ویلے دے نال نال لوکاں دے رویے تے معاشرتی استحصال ویکھ ویکھ کے اوہدے ذہن اُپر کجھ سوچاں دی کاہی جم جاندی اے تے اوہ سوچن لگ پیندا اے کہ زندگی اک خاص رفتار تے پلاننگ نال خود کار چلدی اے۔ زخم جو لکھے جا چکے، دھکے جو مقدر ہوئے اوہناں توں کون بچا سکدا اے۔ شاید زندگی گزارن دا ودھیا حل ایہ وے کہ ایہنوں دھوکھا دتا جاوے۔ محنت تے عمدا ترین کم کرن توں بہتر اے کہ بس دن گزاریا جاوے۔

" بابا سائیں" نوں ملن توں بعد جیون دے بہت سارے ول سکھے۔ ہونا تے ایہ چاہیدا اے کہ سکول، کالج یاں یونیورسٹی وچ انسان جیون دے طریقے سکھ کے نکلے مگر اسی بے مقصد جہی پی ایچ ڈی دی ڈگری لے کے نکلے جہنے دس ہزار مہینا الاونس دتا مگر جیون دے دا پیچ نہ سکھا پائی۔ " بابا سائیں" نوں میں 2021 وچ ملیا۔ اوہ اک عجیب شخصیت اے۔ عجیب ایس لحاظ نال کہ مینوں اجے تک وی پتا نہیں کہ اوہ اک مثبت کردار اے یاں ایہدے اُلٹ۔ آزاد خیال، سیلانی روح، رات توں نفرت کرن والا، تنخاہ توں ڈبل کمیٹیاں پان والا، عورتاں نوں بس ویکھن دی حد تک پسند کرن والا، گویا ایسا کردار جہنے اپنی زندگی نوں وی سیریس نہیں سی لیا۔

" بابا" اوہدا تکیا کلام سی تے " سائیں" اوہ اپنے آپ نوں خُد آکھدا سی۔

بابا سائیں ساڈے منافق، لالچی، ابن الوقت تے فرعون معاشرے وچ رہن واسطے اک مکمل کردار اے۔

اوہنے جین دا ول خُد سکھیا سی نہ کہ کسے ڈگری دین والی فیکٹری توں۔ جے اوہ لکھی پڑھی تے اُصولاں دی گل کردا تے شاید اج اوہدا حال وی ساڈے ورگا ہوندا تے اوہ اندرو اندری مگر مچھ تے فرعوناں نوں ویکھ کے اپنا ای لہو ساڑ رہیا ہوندا۔ اوہدے بہت سارے نظریات توں متفق ہونا ضروری نہیں مگر جنگل وچ رہن واسطےفلسفہ اوہدا ای کامیاب اے۔ مثال دے طور تے اوہدا مننا سی کہ کسے وی ذمے داری نوں صحیح طریقے نال ادا کرنا ضروری نہیں سگوں صرف دن گذارو تے جے فیر وی کم ہوون لگے تے گھنجل پا دیو۔ اوہدا ایہ وی مَننا اے کہ ساڈے معاشرے وچ عہدیاں تے بیٹھے فرعون کم ظرف تے نالائق نیں تے خُشامد کم ظرف دی خوراک ہوندی اے جس دی روز اوہناں نوں ضرورت ہوندی اے۔ اوہدی ایس خوبی پاروں میں سمجھدا ہاں کہ اوہنوں جس تھاں وی عہدا دے دو، اوہ ودھیا طریقے نال چلا لوے گا۔

بابا سائیں سسٹم نوں سمجھ چکیا سی تے ہن اوہ ہر شے توں ماورا ہوچکیا سی۔ سون توں اوہنوں نفرت سی، راتاں نوں ہر کم جو ہو سکدا اے کرن دا شوقین سی، شُتر بے مہار پھرنا اوہدی عادت سی، چنگے بھلے کم نوں وگاڑنا اوہدی مہارت سی۔۔۔۔۔۔۔۔

جے غور نال ویکھیا جاوے تے انج دے بہت سارے کردار ساڈے آل دوالے موجود نیں۔ ایہ کردار ساڈے مُردا نظام تعلیم تے بے حس، مطلبی، ہوس پرست تے منافق معاشرے دی پیداوار نیں۔

افسوس ایہ وے کہ ساڈے تعلیمی ادارے بری طرح ناکام ہو چکے نیں۔ تعلیم صرف نمبراں دا ناں رہ گیا اے تے تربیت دا تصور ای ختم ہو کے رہ گیا اے۔ ہن لکھاں پڑھان والیاں وچوں شاید ای کوئی استاد ہووے ورنہ زیادہ تر ملازم تے کاروباری رہ گئے نیں۔ جدوں ادارا یاں استاد شاگرد دی جیب اتے نظر رکھے گا اوہدا کیہ کردار بن سکدا اے۔ تے لازمی گل اے کہ جدوں ادارے تربیت نہیں کرن گے تے معاشرتی حیوان ہوون کارے انسان معاشرے توں سکھے گا۔ اہم گل کہ جے معاشرہ وی تباہ ہو چکیا ہووے تے کوئی قانون یاں اُصول نہ ہووے تے فیر " بابا سائیں" ای پیدا ہوون گے تے اوہ ہر ادارے نوں اپنے مطابق چلاندے رہن گے۔ ساہنوں عملی طور تے کجھ کرنا پوے گا ورنہ گلاں جنیاں مرضی اسیں کر لئیے کدی گلاں نال وی تقدیراں بدلیاں نیں۔

(جاری اے)