آصف عارف ہوراں دا کلام ----*رویل*

ایہ نہیں اصل نرول تریخ

جو اے تیرے کول تریخ

لوک ادب وچ لُکی اے

ویلا کڈھ تے پھول تریخ

سِدھی سِدھی ہُندی سی

غیراں کیتی گول تریخ

توں پڑھیار تریخ دا ایں ؟

سہج سبھا پڑچول تریخ

چنگے سبق سکھاؤندی اے

وست ہے خوب انمول تریخ

کیہ پنجابی بُزدل نیں ؟

سچی سچی بول تریخ

پڑھ کردار توں پورس دا

جھلیا اپنی کھول تریخ

لکھاں ورھے پرانی اے

تیری سوہنا ڈھول تریخ

آصف وڈیاں وڈیاں دے

کھولدی پئی اے پول تریخ

*****