ٹرمپ اُتے حملا تے امَن مذاکرات-----٭رویل کالم٭

اِک سیانا بندا‘ بھاویں اوہ کسے وی دَھرم یاں دھرتی دا ہووے گا اوس نوں امن دی سدھر رہوے گی سیانے دی شرط ایس لئی رکھ دِتی اے کہ امن دی گل ہو رہی اے امن نال ای قوماں بندیاں نیں‘ اگے ودھیا جاندا اے تے نسلاں وڈے نقصان توں بچ جاندیاں نیں۔ایس امن واسطے ای ساری دُنیا اپنا اپنا جَتن کر رہی اے اوہ چاہندے نیں کہ دُنیا وچ اجہیا امن ہوئے کہ اوہ سبھ خُشی نال اپنا اپنا جیون گزاردے رہن۔صدر ٹرمپ دا وی ایہی بیان اے کہ امریکیاں دی ’خُشی‘ کسے کولوں جَری نہیں جا رہی اے اوہناں دے بقول ایرانیاں ورودھ جو کامیابی ٹرمپ نے حاصل کیتی اے اوہ ای اصل وجھا اے نشانے اُتے رکھن واسطے۔ٹرمپ ولوں جہڑا بیان جاری ہویا اوہدے وچ اوہناں کہیا کہ رییپلکنز پارٹی دے کرتا دھرتا اُتے اں ج دے حملے ہوندے ای رہے نیں ایہ کوئی پہلی وار نہیں ہویا اے۔رییپلکنز پارٹی دی نینہ1854وچ رکھی گئی سی جس نے اپنی لوکائی مِترتا والے اُصولاں نال بڑی شہرت کٹھی تے ویکھدیاں ویکھدیاں ای امریکا وچ ایس پارٹی دی بَلّے بَلّے ہو گئی۔ایس پارٹی ولوں چُنے گئے صدر ابراہام لنکن،جیمز اے گارفیلڈ،جان ایف کینڈی تے ہور کئی امریکی صدر وی حملا آوراں دا نشانا بندے رہے سن۔ایہ سیاسی طور تے سرکاری پالیسیاں دے ورودھ دا وکھالا وی سی جس وچ صدر نوں جانوں مار دین دا مقصد ہوندا سی دوجے پاسیوں جو ایہو جہیا ورودھ وکھا رہیا ہوندا اے اوس نوں سیاسی طور تے پاگل یاں انتہائی سُوجھ وال مَنیا جاندا اے۔ایہ صرف اِک دیس تیکر سِیمت نہیں اے سگوں ایہو جہے سوُجھ والے سیاسی پاگل ہر تھاں اُتے موجود ہوندے نیں تے ایہناں دی تعداد دا کسے نوں وی صحیح اندازا نہیں ہو سکدا اے۔ایہو جہے سیاسی کامیاں کولوں ای ایتھے وی ’کم‘ لئے جاندے نیں کسے دی ذات اُتے چِکڑ سُٹن توں لے کے گولی مارن تک دے سبھ دھندے انجے ای ہو رہے نیں۔ایہدے وچ تیجی،دوجی یاں پہلی دُنیا دے واسیاں دی تفریق اُکا نہیں مِلدی اے‘ تے ایہ سلسلا ادوکے سمے توں ہوندا پیا اے۔کول ٹامس ورگے ہر تھاں تے موجود نیں سگوں اج دے سوشل میڈیا دی جنگ ویلے تاں ایہناں دی تعداد اینی ودھی ہوئی اے کہ پُرامن لوکاں دی تعداد روز گھٹدی جا رہی اے۔

اَمن دی گل نوں جو وی مُکاندا اے اوس نوں انسان‘ انسانیت دی اُکا پرواہ نہیں اے۔ایرانیاں نے اپنے مقصداں نوں ساہمنے رکھیا ہویا اے تے گولی چلاون والے دے اپنے مقصد نیں جس نوں اوہ تفتیش وچ وی دسن لئی تیار نہیں وکھالی دیندا اے۔صدر ٹرمپ دُنیا دے طاقتور دیس دی سبھ توں اُچی گدّی اُتے بیٹھا‘ اِک نہیں کئی وار گولیاں دا نشانا بنایا جاندا رہیا اے۔مُڈھلی پڑتال توں ایہ لگ رہیا اے کہ شُوٹر دا سنبندھ ایرانی جنگ نال نہیں دسیا جا رہیا اے۔حملا آور‘ ٹرمپ توں پندرھاں گز دُور سی جو سیکورٹی ایجنسیاں دی کارکردگی اُتے وی کئی سوال چھڈ رہیا اے کہ کِویں اوہ اینے حصاراں نوں توڑ کے اَپڑیا ہوئے گا جس نے اپنے کول اِک توں ودھ ہتھیار وی رکھے ہوئے سن۔پترکاراں نال کھانے دی اِک تقریب وچ صدر ٹرمپ اپنی گھر والی نال موجوسن کہ اوہناں اُتے گولی چلا دِتی گئی۔

ساڈے دیس دے پردھان منتری ولوں وی بیان جاری ہو گیا اے ”میریاں نیک سدھراں تے دُعاواں صدر ٹرمپ نال نیں۔“

”تہاڈے تے ای کیوں حملے ہوندے نیں؟“ اِک پترکار نے سوال کیتا۔

ایس لئی کہ اسیں امریکا وچ تبدیلی لے کے آئے آں‘ اسیں امریکا وچ خُشحالی لیاندی اے“ صدر ٹرمپ دا جواب۔

واشنگٹن وچ ایہ سبھ ہوندا رہیا پر صدر ٹرمپ دے موہوں خُفیا والیاں دی تعریف ای ہوئی‘ اُنج وی اِنج دا حملا پہلی وار نہیں ہویا۔ایس طرحاں دے حملیاں نوں سوشل میڈیا اُتے ٹرمپ دے نقاداں نے ’شہرت‘ نال جوڑنا شروع کر دینا ہوندا اے جو صدر دے خلاف اپنے اپنے بیان دین توں وکھ ہور کُجھ نہیں ہو سکدا۔ٹرمپ دی گھر والی وی ایسے ای تقریب وچ موجود سی تے ویڈیو راہیں ویکھیا جا سکدا اے کہ ایہ سبھ آنن فانن ہویا کہ سیکورٹی والیاں سبھ نوں محفوظ تھاں ول فوری اپڑا دِتا۔

امریکی وسنیکاں دے آپسی اختلاف وی تاں گھٹ نہیں نیں‘ اوہناں دے وچکار وی اِک دوجے کولوں بازی لیجان دی کوشش کیتی جاندی اے۔جدوں دُنیا وچ ویکھیا جا رہیا اے کہ امن ول گل اگانہ ودھ رہی اے تے ایہ ’کریڈٹ‘ وی کسے نوں مِلن لگا اے تاں ایس دے اثرات امن لئی ہوون والے مذاکرات دے پینا وی تاں ممکن نیں۔ہُن سوال ایہ وی پیدا ہو جاندا اے کہ امن لئی ہوون والے مذاکرات پہلے والے سِٹّے ساہمنے لیان گے یاں ہُن حالات ہور ہو جاون گے کیوں جے سیکورٹی نوں خدشات تاں ودھ گئے نیں۔

گولی چلان والے کول ٹامس دا ٹارگٹ کیہ سی کیہ اوہ واقعی ای امن لئی ہوندی گلبات نوں دبان وچ کامیاب ہو جائے گا یاں اوس نوں صرف ٹرمپ نال کوئی ذاتی دُکھ اے جس بارے ٹرمپ نے اپنی پریس کانفرنس وچ وی اشارا دِتا اے تے کہیا کہ ایران نال جنگ وچ ساڈی ’کامیابی‘ کسے کولوں جَری نہیں جا رہی اے ایہدے وچ ٹرمپ دا اشارا نہیں سگوں کئی اشارے نیں جس نوں اہ ضرور سمجھن گے جو امریکیاں تے اوہناں دے من موہنے صدر ٹرمپ توں اُکا خُش نہیں نیں۔ٹرمپ ولوں تقریبات منسوخ کرن دی بجائے اگلے تیہ دناں بعد دُبارا تقریب دا سُنیہا وی دے دِتا گیا اے جو حملا آوراں دی ہار ول سنکیت اے۔

”اسیں اپنیاں تقریباں منسوخ نہیں کراں گے“ صدر ٹرمپ دا کہنا سی ”حملا آور نے جو وی کیتا اے سانوں لگدا اے اوس نے ایہ ذاتی طور تے کیتا اے۔“صدر ٹرمپ دا ذمے داری والا بیان آیا اے اوہناں دا کہنا سی کہ امریکا دے سیکورٹی دے اِدارے دُنیا دے بہترین اِدارے نیں۔بڑی نپی تُلی گلبات ہو رہی اے کیہ ایہدے وچ ایہی اشارا تے نہیں دِتا جا رہیا اے کہ ساڈے سیکورٹی دے ادارے سبھ توں ودھیا نیں۔جے ایہ سبھ گلاں مَن وی لئیاں جان کیہ سیکورٹی اینی غیر ذمے دار سی کہ دُنیا دے

طاقتور دیس دے صدر نوں خُفیا والیاں نے پہلاں توں جانکاری ای دینا مناسب نہیں سمجھی تے اوہ حملا آور کول ٹامس‘کیلیفورنیا داوسنیک اے جس نوں چیک پوسٹ توں دَھر لیا گیا اے۔

امریکاوچ جدوں کوئی ہلچل نہیں ہو رہی ہوندی اے تاں صدر ٹرمپ اُتے حملا ہو جاندا اے ایہ حملا کوئی پہلی وار نہیں ہویا اے پرایس وار ایس حملے نوں ایران امریکا جنگ نال جوڑیا جاوے گا تے امن دی گلبات نوں مُکاون دے راہ بنائے جاون گے جس نال پُوری دُنیا متاثر ہوئے گی۔

٭٭٭٭٭