" کنکاں دے اولھے "پنجابی سینیما وچ نِگر وادھا۔۔۔۔٭رویل کالم٭

کسے وی سماج وچ جیون گزارن دے وکھ وکھ اُصول ہوندے نیں پر کُجھ اُصول سانجھے ہوندے نیں جہناں دا ورودھ کرن والیاں نوں کدھرے وی چنگا نہیں سمجھیا جاندا اے۔سماج دے جتھے سوہنے سلکھنے مُکھ نیں اوتھے ایہدے گھناؤنے چہرے وی نہیں جس نال سماج نوں گرہن لگیا ہویا اے۔۔۔۔پنجابی فلم " کنکاں دے اولھے " وچ وی سماج دے کئی چہریاں نوں وکھایا گیا اے۔ ایس فلم دا مُڈھ اِک ویاہ توں شروع ہوندا اے ایہ ویاہ اے نِکی عمر دے مُنڈے تے کُڑی دا جس نوں ہندوستان دے سماج وچ "بال وِواہ" دے طور تے جانیا جاندا اے اج وی کئی قبیلے لُک چھُپ کے ایہ گھناؤنی رسم نبھا رہے نیں جو کسے وی طرحاں انسانی نہیں سگوں ایس دی ہر پرت ای غیر انسانی جاپدی اے۔گُرپریت گھُگھی جو چڑھدے پنجاب وچ پنجابی فلم دے سرخیل نیں تے اپنی اداکاری دا لوہیا منوا چُکے نیں پر بُہتا کر کے اوہناں نوں " مزاحیا اداکار" سمجھیا جاندا رہیا پر ایس فلم وچ اوہناں نے مُڈھ توں اخیر تیکر جہڑی سنجیدگی تے اپنے کردار دے ٹھرمے نوں اپنے جُسے تے گلبات نال بیان کیتا اے اوہ انت اے تے خُد نوں اِک "وڈا کلاکار " ثابت کر دِتا اے۔اوہ اِک فوجی دے کردار وچ فلم دے شروع وچ اپنی محبوبا دے کہن تے واپس آ جاندے نیں اونے چر نوں محبوبا "پِیا گھر " سُدھار چُکی ہوندی اے تے اوہ فیصلا کردے نیں کدے وی نہ ویاہ کرن دا۔۔۔۔نِکی عمر دے ویاہ ویلے وی کُجھ اجہیا واپر چُکیا اے جو فلم نوں کئی موڑ دیندا اے ویاہ مگروں ووہٹی نوں لیجاندیاں ہویاں سو بندے ندی دا پُل ٹُٹ کارن ہڑ دا شکار ہو جاندے نیں تے ڈُب کے مر جاندے نیں تے ایہ اٹھ نَو ورھیاں دی "کرموں" سماج دی نگاہ وچ " کلیہنی " بن جاندی ہُن اوس دا پیو وی اگلے جہان جاون مگروں اوس دا چاچا ای اوہدا سبھ کُجھ اے ۔۔۔فیر ملاقات ہوندی اے وچولے دی کلے رہ جاون والے فوجی نال تے کلیہنی دا رساک ہو جاندا اے اوہ اپنی ووہٹی نوں کُچھڑ چُک کے گھر لیاندا اے سارا سماج بِٹر بِٹر تک رہیا اے تے نہ کہندیاں وی سبھ کُجھ کہی جا رہیا اے۔گرپریت گھگھی نے اپنے کردار نال اجہیا انصاف کیتا اے کہ اوہ ویکھن والیاں دے دل وچ نقش ہو جاندا اے تے کرموں دا کردار نبھاندی اے "تانیہ" جو ایس فلم وچ اُکا ای وکھری وکھالی دیندی اے۔ویلا پَر لا کے اُڈدا اے تے فوجی بُڈھا ٹھیرا ہو چُکیا اے تے الھڑ جوان سُہپن نال رَجی "کرموں " نوں راہے راہے جاندی نوں کوئی ویکھ لیندا اے جس نال کہانی اُکا ای بدل جاندی اے۔۔۔۔۔۔۔۔۔۔رہ گئی گل تانیہ دی اداکاری دی تاں اوس دے سُہپن توں وی ودھ اوس دی اداکاری ویکھی جا سکدی اے اوہ منجھے ہوئے اداکاراں ساہویں کھلو کے جِیوں خُد نوں چمکدا تارا رکھ لیندی اے اوس دے سُچے فنکار ہوون دا پکا پِیڈھا ثبوت وی اے۔ہر اداکار دی اجہیا ودھیا کم کر رہیا اے کہ اوس دے فن دا کمال نظریندا اے ایہدے پِچھے چنگے ہدایتکارتیجندر سنگھ دی ہدایتکاری نہ ہوندی تاں کُجھ وی سپھل نہیں سی ہو سکنا ،ایس فلم دی کہانی گرجند مان نے لِکھی اے جس نے کدھرے کوئی جھَول نہیں رہن دِتا اے کہانی اینی مضبوط اے کہ ایہ فلم تہانوں کدے بھُلے گی نہیں۔بُڈھے لاڑے نے جو فیصلا کیتا سی اوس وچ " پُن " سی تے ساری دُنیادے "پُن " کرنا کرموں نوں پسند نہیں سی اوہ وی تاں کوئی فیصلا کردی اے پُن کرن توں وی کوئی وڈا فیصلا جس دی واج اوہ اینی اُچی کر کے سُناندی اے کہ اوہ گھر دیاں کندھاں توں باہر تیک سُنائی دیندی اے۔

فلم نوں ویکھدیاں ہویاں تُسیں کرداراں دے نال جیوں جُڑ جاؤ گے تے درد ،کرب تے اوکڑاں نوں محسوسدے جاؤ گے پر شرط ایہی اے کہ اندر دے دُکھ نوں ویکھ والی اَکھ تےا حساس والا دِل ہونا چاہیدا اے۔